Lögreglan á höfuðborgarsvæðinu bendir fólki á að kaupa ekki klippikort í bílaþvottastöðina Löður í Reykjavík af neinum öðrum aðila en af starfsfólki Löður á þvottastöðvum fyrirtækisins.
„Ekki kaupa köttinn í sekknum,“ segir í Facebook-færslu LRH. En í aðdraganda jóla var brotist inn í bílaþvottastöðina Löður við Fiskilóð í Reykjavík. Þjófurinn hafði á brott með sér verðmætaskáp sem í var lausafé en auk þess var nokkur fjöldi af 12 skipta klippikortum.
Lögreglan vill koma því á framfæri að klippikortin eru númeruð og hafa starfsmenn Löðurs yfirsýn yfir seld kort og óseld kort. Ef fólk vill ekki kaupa köttinn í sekknum er fólki bent á að versla aðeins slíkt kort beint af starfsfólki Löðurs. Öll kort á válistanum hafa verið gerð ógild.
Ef einhver kann að hafa upplýsingar um innbrotið eða verið boðin þvottakort frá Löðri til kaups, er viðkomandi beðinn um að senda lögreglu upplýsingar í netfangið [email protected] eða einkaskilaboð á fésbókarsíðu embættisins.