Í gær var tilnefndur réttargæslumaður í máli Dönu Jóhannsdóttur en hún er ein níumenninganna sem létust í umsjón dr. Skúla Tómasar Gunnlaugssonar á HSS.
Sjá einnig: Meint fórnarlömb Dr. Skúla orðin 14 talsins – Málin rannsökuð sem manndráp
Eva Hauksdóttir, dóttir Dönu Jóhannsdóttur skrifaði færslu á Instagram-reikningi sínum í gær þar sem hún birti mynd af móður sinni, sem lést eftir að hafa verið sett í lífslokameðferð að því er virðist að ósekju en lögreglan rannsakar nú þátt dr. Skúla í málinu sem og tveggja annarra heilbrigðisstarfsmanna. Við myndina skrifaði Eva texta þar sem hún fagnar því að búið sé að tilnefna réttargæslumann í máli móður hennar en fjölskyldunni hafði verið synjað um það áður.
„Í dag varð sá ánægjulegi atburður að tilnefndur var réttargæslumaður í máli Dönu Jóhannsdóttur (HSS málið). Fjölskyldunni hafði áður verið synjað um réttargæslumann en með nýjum lögum sem tóku gildi þann 15. júní var staða brotaþola bætt og á þeim grundvelli náði þessi krafa loksins fram að ganga. Fyrir fjölskylduna merkir þetta að lögreglan getur ekki lengur látið eins og aðstandendum komi málið ekki við.“