Einu rökin fyrir því sem ég finn fyrir því hvers vegna þú og þínir líkir uppfyllið ekki þarfir þjóðarinnar við nýtingu á sínum eigin auðlindum í gegnum 48 daga veiðikerfi eru engin nema mannvonskan í sinni tærustu mynd.
Sjávarútvegsráðherra er tilbúin að stökkva fram á vígvöllinn og segja hið svokallaða 48 daga strandveiðikerfi full reynt í óþökk við flest fólk sem starfar í því. 48 daga kerfi sem var aldrei neitt 48 daga kerfi vegna valdníðslu hennar og fl. stjórnmálamanna gegn þjóð sinni og þjónkun þeirra við SFS sem er ekki þjóðin.
Á meðan mokar hún og hennar líkir byggðarkvótanum úr almenna byggðarkvótakerfinu í stórútgerðina sem þarf ekkert á honum að halda til að lifa. Byggðarkvóta sem þjóðin þarfnast til að tryggja hér 48 daga á hvern einasta strandveiðibát á landinu og til þess að bæta hér búsetuskilyrði allt í kringum landið, lífsgæði og atvinnustig og í kerfi sem erfitt er að misnota. Kerfi sem er almennt en ekki kerfi sem er sniðið fyrir misnotkun eins og almenna byggðarkvótakerfið er og örugglega eitthvað af sértæka líka.
Hvað finnst henni þá um allt hitt kerfið sem átti að byggja hér upp fiskistofna en hefur ekki gert það í 40 ár. Fiskistofnar eru annað hvort útdauðir eða þá við það að verða útdauðir samkvæmt mælingum Hafró. Finnst henni það kerfi þá ekki full reynt þó svo sú tilraun sé búin að standa í um 40 ár með minna en engum árangri og hefur kostað þjóðina svo miklar fjárhæðir að færustu hagfræðingar heims gætu ekki reiknað sig niður á þá tölu …
Kosningaloforð Vinstri Grænna voru 48 daga strandveiðikerfi, auka hlut veiðiréttar þjóðarinnar með því að stækka 5,1 % pottinn svo um munar. Lygar og svik við fólkið í landinu til að ná til atkvæða þeirra fyrir kosningar kallast ekkert annað en landráð á góðri íslensku. Í raun eru fiskveiðikerfi okkar Íslendinga ekkert nema landráð og þjófnaður frá fólkinu í landinu á auðlind sem fólkið í landinu á saman. Veiðiréttur sem tekinn var frá fólkinu í landinu og fært örfáum í nafni uppbyggingar fiskistofna sem hefur sannarlega ekki tekist. Svandís Svavarsdóttir, þú veist alveg hvers þjóðfélagið þarfnast. Það eru 48 dagar á hvern einasta strandveiðibát í kringum landið án nokkurra svæðaskiptingar. Til þess að þessir dagar verði nýttir í hverri sjávarbyggð þegar fiskur er á þeirra heimaslóð þá eiga bátarnir að fá að veiða daga sína allt árið eða þegar þeim hentar það. Þá myndi kerfið virka 100% sé horft til byggðasjónarmiða og 100% sé horft til mannréttinda og lífsgæðauppbyggingar allt í kringum landið okkar.
En nei, þú kýst að vera undir pilsi einhvers annars en þjóðarinnar, einhvers sem óskar sér þess að smábátaútgerð leggist alfarið af í kringum landið og að mannréttindi okkar verði fótur troðinn og að fólkið í landinu geti bara étið skít svo að einhver sem er feitur af aurum verði feitari.
Við erum fiskveiðiþjóð og fólkið í fiskveiðsamfélögum þarfnast fiskveiðiréttar, annars þrífst fólkið ekki og samfélaginu hnignar. Fiskveiðiréttar sem var rænt frá þjóðinni og færður öðrum. Handfæraveiðar eru ekki orsakavaldur á hnignun fiskistofna og eiga ekkert skylt með veiðiráðgjöf fyrir tortímandi veiðarfæra.
Einu rökin fyrir því sem ég finn fyrir því hvers vegna þú og þínir líkir uppfyllið ekki þarfir þjóðarinnar við nýtingu á sínum eigin auðlindum í gegnum 48 daga veiðikerfi eru engin nema mannvonska í sinni tærustu mynd …
Vigfús Ásbjörnsson
Strandveiðisjómaður á Hornafirði