Gerð var tilraun til vopnaðs ráns hjá úrsmiðnum Georg V. Hannah í Reykjanesbæ þann 20. febrúar. Ræninginn var vopnaður öxi og gekk berserksgang í versluninni og olli miklum skemmdum. Í nýjasta tölublaði Víkurfrétta er viðtal við starfsmenn verslunarinnar sem voru á staðnum þegar ræninginn ætlaði að hafa með sér skartgripi fyrir eina og hálfa milljón króna á brott.
Eggert Hannah, sem rekur verslunina, viðurkennir að hann hafi haft áhyggjur af foreldrum sínum þegar hann segir frá atvikinu í samtali við Víkurfréttir. Hann var í versluninni ásamt foreldrum sínum Georgi og Eygló sem hafa átt verslunina í rúm 50 ár.
Ryksögurör og hamar
Í samtali við Víkurfréttir lýsir Georg því hvernig hann greip ryksökurör og reyndi að verjast manninum með því meðan á ráninu stóð.
Þegar maðurinn henti öxinni inn í glerskáp og gekk út úr versluninni veittu feðgarnir honum eftirför, Georg með ryksugurörið en Eggert með hamar. Þeim tókst að króa manninn af fyrir utan verslunina og halda honum þar þangað til lögregla kom á vettvang.
Eggert, Georg og Eygló segja að biðin eftir lögreglunni hafi verið löng en það liðu tæpar sex mínútur frá því að þau hringdu í neyðarlínuna og þar til lögreglan kom á staðinn.
Maðurinn sem grunaður er um tilraun til vopnaðs ráns í versluninni var í úrskurðaður í fjögurra vikna gæsluvarðhald þann 23. febrúar.