Ragnar Þór Pétursson, formaður Kennarasambands Íslands, fór yfir stöðuna í skólamálum á upplýsingafundi Almannavarna sem fram fór fyrr í dag.
Benti hann á að fylgjast með leik barna sem láti oft hugsanir sínar sem þau geti ekki orðað birtast í leik. Nefndi hann sem dæmi að vinsælasti leikurinn í frímínútum sé eltingaleikur þar sem krakkarnir flýja þann sem er kórónuveiran.
Mikilvægt að fylgja fyrirmælum
Ragnar Þór áréttaði mikilvægi þess að fylgja fyrirmælum stjórnvalda. Skólakerfið muni raskast og álagið vera mest á leikskólum, hversu mikið fer eftir ytri aðstæðum og hvort fólk sýni samfélagslega ábyrgð. Mikilvægt sé að foreldrar bregðist við ef börn þeirra þurfi að vera heima, ekki eigi að senda þau til afa og ömmu, af augljósum ástæðum.
„Mig langar að höfða til ábyrgðarkenndar almennings og sérstaklega atvinnulífsins með það að ef fólk er í aðstöðu til þess að vinna heima, að veita sveigjanleika og halda leikskólabörnum heima – gerið það.“
Forgangur að passa upp á að nemendur flosni ekki upp úr námi
Ragnar Þór sagði að stefnt væri að því að passa upp á að nemendur flosni ekki upp úr námi. Ekki sé öruggt að hægt sé að fyrirbyggja slíkt, en reynt verði eftir bestu getu.
Mikilvægt að auka ekki kvíða nemenda
Ragnar Þór segir hagsmuni nemenda verða í forgangi. Það þurfi að sýna ábyrgð og horfast í augu við stöðuna sem nú er í gangi, nægur kvíði sé á meðal margra framhaldsskólanema og því mikilvægt að auka ekki á þá pressu.
Það verði farið í það verkefni í framhaldsskólum að finna leiðir, skilgreina forgangshópa og leysa þau mál.