Veðurstofa Íslands spáir gosi á svæðinu í kringum Fagradalsfjall á næstu dögum. Þetta kemur fram á vef Veðurstofunnar og byggir hún spá sína á nýju líkani. Svo virðist sem jarðskjálftahrina, sem hefur líklega ekki farið fram hjá neinum, sé forveri goss.
„Niðurstöður aflögunarlíkana sem gerð voru í dag benda til að kvikugangurinn undir Fagradalsfjalli liggi mjög grunnt eða í kringum 1 km undir yfirborðinu. Kvikuinnflæðið er nokkuð ört, en það er nálægt tvöfaldur hraði frá því sem var í aðdraganda fyrra goss í febrúar/mars 2021,“ segir Veðurstofan.
Því eru verulegar líkur á gosi á næstunni. „Það virðist vera að hægja á aflögun og skjálftavirkni eins og staðan er núna en á seinasta ári var það einn af forboðunum fyrir eldgosið. Innskotið nú er meðfram nyrðri huta kvikugangsins frá í fyrra og nær frá miðju gangsins hálfa leið að Keili. Líkurnar á því að það gjósi á svæðinu í kringum Fagradalsfjall á næstu dögum eða vikum hafa því aukist og eru taldar verulegar.“