Lögreglan á höfuðborgasvæðinu heimsótti börn í 4. bekk í Mýrarhúsaskóla þar sem farið var yfir ýmis öryggismál tengdum umferðinni og hljólanotkun. Svo fengu börnin að prófa kaskeiti einnar lögreglunnar og þá var voðinn vís.
Dagbók lögreglunnar sem nær yfir störf lögreglunnar frá fimm í morgun og fram á miðjan dag í dag er óvenju fyndin þó auðvitað sé einnig sagt frá lögbrotum sem ekki eru kómísk.
Innan um frásagnir af neyslukeyrslu, innbrotum og slagsmála er einnig að finna gullmola. Hljóðar hann eftirfarandi:
„Lögregla sinnir samfélagslöggæslu og heimsækir börn í 4. Bekk í Mýrarhúsaskóla. Farið var yfir notkun og mikilvægi reiðhjólahjálma, hvernig skal stilla þá og mikilvægi þess að fylgjast vel með í umferðinni. Uppbyggilegar og gagnlegar umræður áttu sér stað ásamt reynslusögum nemenda úr umferðinni og spurningum svarað sem brunnu á nemendum. Nemendur fengu að skoða lögreglubifreið og mótorhjól en farið var vel yfir tækjabúnað lögreglu. Talsverður fjöldi nemenda fékk að máta kaskeiti undirritaðs þar til starfsmenn Mýrarhúsaskóla bentu undirrituðum góðfúslega á það að lús gæti verið á ferli. Undirritaður hefur klæjað í hársvörð síðan.“