Dagur B. Eggertsson, borgarstjóri Reykjavíkur, mun ekki bjóða sig fram til formennsku í Samfylkingunni. Hann staðfestir þetta í samtali við Fréttablaðið. Dagur segist þó ekki útiloka þátttöku í þjóðmálunum seinna meir.
Logi Einarsson hyggst hætta sem formaður Samfylkingarinnar á landsfundi flokksins í október. Á sama fundi verður því kosið um arftaka hans, en þau nöfn sem hafa hve mest verið nefnd í tengslum við formannskjörið eru Dagur B. Eggertsson og Kristrún Frostadóttir. Dagur hefur nú slegið það út af borðinu og segir það ekki raunhæft, þar sem hann sé að fara af stað í nýtt kjörtímabil í borginni. Kristrún hefur hins vegar boðað stuðningsfólk sitt til fundar á morgun, föstudag, að því er fram kemur í frétt Morgunblaðsins. Líkum er leitt að því að þar hyggist hún tilkynna um formannsframboð, þótt Kristrún sjálf hafi ekkert upplýst um tilefnið. Hún hefur ekki viljað staðfesta stað og stund fundarins en segist munu tilkynna um það í fyrramálið.
Eftir að Logi upplýsti um það að hann myndi axla ábyrgð á slöku gengi Samfylkingarinnar í síðustu alþingiskosningum með því að stíga úr formannsstólnum hefur Dagur sterklega verið orðaður við forystustöðuna og ákvörðunar hans beðið átekta. Hann segist sjálfur hafa skynjað mikinn stuðning í kringum sig. Dagur fullyrðir að kallað hafi verið eftir nýrri ríkisstjórn sem mynduð yrði „frá vinstri yfir á miðjuna,“ eins og er í borginni. „En ég er að hefja nýtt kjörtímabil í borginni og á ekki sæti á þingi. Þess vegna var langsótt að ég byði mig fram til formennsku í flokknum,“ segir hann í samtali við Fréttablaðið. Aðspurður segir hann útilokað að hann komi til með að bjóða sig fram. Hans hlutverk nú sé frekar að styðja við nýja forystu.
Dagur segist ekki útiloka framboð til Alþingis, þótt hann stefni ekki sérstaklega að því heldur.
Athugasemdir