Sunna Dóra Möller prestur segir miklar starfsmannahreinsanir hafa átt sér stað frá því að mál Gunnars Sigurjónssonar prests kom upp í desember árið 2021.
Þar sökuðu sex konur Gunnar um einelti, kynferðislega áreitni og kynbundið ofbeldi. Í skýrslu frá óháðu teymi þjóðkirkjunnar var að lokum staðfest á síðasta ári á Gunnar hefði gerst sekur um tíu brot.
„Organistinn er síðasti þolandinn sem fær að fjúka úr Digranesi og hefur þá orðið algjör og fordæmalaus hreinsun á starfsfólki innan kirkjunnar sem stóð að baki skýrslunni gegn Gunnari, ásamt konum sem voru á hliðarlínunni með tengsl og annars konar ofbeldismál gegn til dæmis núverandi sóknarnefndarformanni,“ sagði Sunna í samtali við Fréttablaðið og vísar til Valgerðar Snæland Jónsdóttur, formanns sóknarnefndar kirkjunnar.
„Við þolendur höfum notið eins mikils skjóls frá Biskupsstofu eins og mögulegt er og fyrir það er ég þakklát,“ segir Sunna en Gunnar fær ekki að snúa aftur til starfa. Þá kemur fram í umfjöllun Fréttablaðsins að fólk hafi verulegar áhyggjur af stöðu kirkjunnar en margir telja nauðsynelgt að formaður sóknarnefndar stigi til hliðar.
„Það er ekkert í starfsreglum kirkjunnar sem heimilar biskupsembættinu að hrófla við sóknarnefndum þegar svona mál koma upp og þar liggur vandinn,“ sagði Sunna.