Nokkuð var um hraðakstur í gærkvöldi og nótt á höfuðborgarsvæðinu. Þar voru til að mynda þrír ökumenn teknir fyrir of hraðan akstur þar sem hámarkshraði var 80 km/klst. Einn var á 122 km. hraða, annar á 125 km. hraða og þriðji á 146 km. hraða.
Í Vogahverfi í Reykjavík var tilkynnt um skemmdarverk á bifreið. Málið er til rannsóknar hjá lögreglu.
Brotist var inn í Hlíðahverfi í Reykjavík. Þá var tilkynnt um aðila sem hafði sofnað áfengissvefni fyrir utan skemmtistað í miðbænum. Lögreglu tókst að vekja viðkomandi sem hélt til síns heima.
Tilkynnt var um tvö innbrot í bíla. Í báðum tilfellum höfðu einhverjir munir verið teknir úr bílunum og hanskahólfið tæmt í öðrum þeirra. Málið er til rannsóknar hjá lögreglu.
Lögregla fékk tilkynningu um æstan aðila í verslun í hverfi 112 í Reykjavík. Lögregla mætti á staðinn og ræddi við einstaklinginn, sem róaðist í framhaldinu lét sig hverfa úr versluninni.
Einn af þeim ökumönnum sem stöðvaðir voru fyrir of hraðan akstur í nótt var undir áhrifum áfengis. Hann streittist hins vegar við og neitaði að gefa lögreglu upp kennitölu sína sem og að gefa öndunarsýni í áfengismæli. Viðkomandi var þá handtekinn fyrir ölvun við akstur og vistaður í fangageymslu lögreglu meðan málið er rannsakað.