Starfsfólk utanríkisþjónustunnar hefur unnið á vöktum allan sólarhringinn og aðstoðar Íslendinga sem eru staddir erlendis við að komast heim.
Dagana 20.-23. mars hefur borgaraþjónusta ráðuneytisins sinnt hátt í 900 erindum, samanborið við 2.000 erindi dagana 14.-19. mars. Fyrirspurnum hefur því fækkað nokkuð en þær verða að sama skapi flóknari viðureignar. Þetta kemur fram í stöðuskýrslu almannavarna sem var send út í gær.
Í skýrslunni segir að töluvert hafi borið á því að Íslendingar eigi í erfiðleikum með að finna greiða leið heim vegna landamæralokana og hertra skilyrða fyrir millilendingum.
1.000 komast heim fyrir mánaðarmót
Frá 25. febrúar 2020 þegar grunnurinn var opnaður, hafa 10.500 manns skráð sig. Af þeim eru 6.000 manns komnir heim.
Um 4.500 manns sem eru skráðir í grunninn eru enn erlendis en tæplega 1.000 úr þeim hóp eru með áætlaða heimför fyrir mánaðamót. Aðrir 1.000 eru með áætlaða heimför næstu tvo mánuði.
Um 2.500 eru skráðir með óvissan heimferðardag og bendir það til þess að þau dvelji langdvölum erlendis.