Laust eftir klukkan eitt í nótt var lögreglunni á höfuðborgarsvæðinu tilkynnt um þjófnað úr verslun. Þar hafði maður ætlað sér að stinga af með tvær samlokur úr versluninni, þegar öryggisvörður gómaði hann við þjófnaðinn. Sá óprúttni sló þá öryggisvörðinn.
Ökumaður var stöðvaður fyrir hraðakstur á Reykjanesbraut í gærkvöldi. Hann ók á 182 kílómetra hraða á klukkustund. Hann viðurkenndi hraðaksturinn en taldi sig hafa ekið á nær 200 kílómetra hraða á klukkustund. Tjáði hann lögreglu að hann hafi verið of seinn í vinnu og þess vegna ekið svona hratt. Lögregla tók þá afsökun ekki gilda og maðurinn komst ekki í vinnuna, að minnsta kosti ekki um tíma, þar sem hann var færður á lögreglustöð og sviptur ökuréttindum til bráðabirgða. Hann var síðan látinn laus.
Nokkuð var um tilfelli þar sem ökumenn voru stöðvaðir vegna gruns um akstur undir áhrifum áfengis eða fíkniefna.