„Það er alveg einstakt hvað við höfum náð langt í baráttunni við veiruna en við erum líka með gott fagfólk í þessu stóra verkefni. Með okkar aðferðum og verkfærum hefur okkur tekist mjög vel til,“ segir Svandís Svavarsdóttir heilbrigðisráðherra þegar hún er spurð um hvort einhver jákvæð teikn megi finna á tímum COVID-19
Svandís er gífurlega stolt af íslensku þjóðinni og sannfærð um að sagan af baráttu þjóðarinnar við COVID-19 verði saga sem fleiri þjóðir muni vilja heyra.
„Við getum öll verið ofsalega stolt. Bæði sem einstaklingar, fjölskyldur og þjóð. Það hefur verið algjörlega magnað að sjá baráttu þjóðarinnar gegn áhlaupi þessa faraldurs,“ segir Svandís.
„Persónulega finnst mér þetta hafa verið leiðangur sem hefur dregið fram það besta og sterkasta í íslensku samfélagi. Við hikum ekki við að standa saman undir miklu álagi og erum fljót að hugsa út fyrir boxið, Við eigum að vera stolt af því að vera þátttakendur í slíku samfélagi.“