Meirihluti bæjarstjórnar Ísafjarðarbæjar, sem samanstendur af Framsóknarflokki og Sjálfstæðisflokk, og Guðmundur Gunnarsson bæjarstjóri hafa komist að samkomulagi um starfslok Guðmundar og lætur hann af störfum nú þegar. Ástæða starfsloka er ólík sýn á verkefni á vettvangi sveitarfélagsins og telja aðilar það sveitarfélaginu fyrir bestu að leiðir skilji.
Þetta kemur fram í tilkynningu frá Ísafjarðarbæ. Bæjarritari, sem er staðgengill bæjarstjóra, mun gegna starfinu þar til skýrist hvernig ráðningu á næsta bæjarstjóra verður hagað.
Guðmundur var ráðinn í ágúst árið 2018, en alls 13 sóttu um stöðuna.
Eyjan greindi fyrst frá, en Kristján Þór Kristjánsson, forseti bæjarstjórnar, vildi ekki tjá sig um lengd eða upphæð starfslokasamningsins við Eyjuna. Þá sagði hann ekki búið að ákveða hvort starfið yrði auglýst að nýju.