Illugi Jökulsson, rithöfundur og fjölmiðlamaður segir helsta hlutverk Bjarna Benediktssonar fjármálaráðherra sé að svelta heilbrigðiskerfið. Þakka Katrínu fyrir að gera honum það kleift.
Í færslu á Facebook við frétt Fréttablaðsins þar sem Bjarni dásamar einkavæðingu í heilbrigðisgeiranum, segir Illugi að þarna megi sjá eitt helsta hlutverk Bjarna í pólitík. Þakkar hann svo Katrínu og fleirum í Vinstri grænum.
„Þarna er komið eitt helsta hlutverk Bjarna í pólitík. Svelta heilbrigðiskerfið svo allir láti sér lynda þegar hann færir hræið vinum sínum. Takk Katrín fyrir að gera honum þetta kleift. Takk Mummi. Takk Steinunn Þóra og þið hin. Bjarni mun þakka ykkur í huganum þegar hann flyst að lokum suður til Flórída eftir vel unnin störf fyrir ríka fólkið sitt. Og takk alveg sérstaklega Svandís. Vel gert hjá ykkur, ha?“
Færslunni svara nokkrir en eitt þeirra er Oddný Harðardóttir, þingmaður og fyrrverandi ráðherra og formaður Samfylkingarinnar: „Fór VG ekki í ríkisstjórn til að bjarga heilbrigðiskerfinu? Núna er verið að auglýsa eftir einkaaðila til að reka heilsugæslu á Suðurnesjum. Heilbrigðisstofnun Suðurnesja hefur ekki fengið fjárveitingu í takti við fjölgun íbúa, verið fjársvelt. Í stað þess að styrkja opinbera heilbrigðisþjónustu við Suðurnesjamenn og heilbrigðisstofnun svæðisins er grunnþjónustan boðin út.“