Sólveig Anna Jónsdóttir, formaður Eflingar, segir það sem hún kallar „ofurlaun kjörinna fulltrúa“ sýna mikið virðingaleysi gagnvart almenningi.

Sólveig Anna Jónsdóttir skrifaði Facebook-færslu í gær við frétt Morgunblaðsins um laun Heiðu Bjargar Hilmisdóttur, borgarstjóra Reykjavíkur, fyrir formennsku í SÍS.

„Fréttir af ofurlaunum lýðræðislega kjörinna fulltrúa sýna okkur það mikla virðingarleysi sem að ríkir gagnvart almenningi hjá pólitískri yfirstétt. Fólk sem hefur ekki tekið neina pólitíska áhættu eða stigið fram með traustvekjandi hugmyndir og lausnir á stórum vandamálum, í raun ekki sýnt sérstaka leiðtogafærni svo eftir sé tekið, er komið með svipuð laun og forríkir kapítalistar sem að lúta engu lýðræðislegu aðhaldi.“

Að lokum segir Sólveig Anna:

„Það er eitthvað mjög mikið að þegar stór og smá samfélagsleg vandamál fást ekki leyst og versna með hverju misseri en ráðamenn skammta sér engu að síður sífellt stærri bita af kökunni sem að vinna okkar skapar.“

Heiða Björg Hilmisdóttir hefur ekki svarað fyrirspurn Mannlífs.