Senda Húnvetningum samúðarkveðjur: „Þið eigið hug minn allan“

Fulltrúar sveitastjórna á Austurlandi hafa í morgun sent íbúum Húnabyggðar samúðarkveðjur vegna harmleiksins á Blönduósi aðfaranótt sunnudags, þar sem tveir létust og sá þriðji illa haldinn á sjúkrahúsi eftir skotárás í heimahúsi. Austurfrétt segir frá málinu.

Í morgun sendi bæjarráð Fjarðabyggðar, frá fundi sínum, hugheilar samúðarkveðjur til sveitastjórnar og íbúa Húnabyggðar.

„Hugur okkar er með ykkur öllum og sérstaklega þeim sem eiga hvað mest um sárt að binda vegna þessa. Megi allar góðar vættir fylgja ykkur og styrkja vegna þessa. Hlýjar kveðjur að austan,“ segir í bókun ráðsins.

Þá sendi sveitastjóri Múlaþings, Björn Ingimarsson Húnvetningum kveðjur á Facebook-síðu sinni: „Hugur minn er hjá íbúum og kærum vinum á Blönduósi. Þið eigið hug minn allan.“

Aukreitis sendi oddviti Fljótsdalshrepps, Jóhann Frímann Þórhallsson frá sér kveðju á Facebook: „Ég sendi kærleika og ljós til allra og um allt og til þeirra sem sérstaklega þurfa á að halda. Langar að biðja ykkur að gera það sama. Hugur minn er hjá fjölskyldum og íbúum Blönduóss.“