Sérsveitin ruddist inn á hótel í miðborginni í gærkvöld og handtók þrjá aðila.
Aðilarnir þrír voru vopnaðir skotvopnum, skotfærum og með fíkniefni í fórum sínum. Lögreglan naut aðstoðar Sérsveitar Ríkislögreglustjóra við aðgerðirnar. Voru aðilarnir vistaðir í fangaklefa í þágu rannsóknar málsins.
Í gærkvöld barst lögreglu einnig tilkynning um eignarspjöll á grunnskóla í austurborginni. Höfðu þar ungmenni valdið skemmdum með flugeldum.
Nokkuð rólegt var að öðru leiti samkvæmt dagbók lögreglu en nokkrir voru teknir grunaðir um akstur undir áhrifum áfengis og/eða fíkniefna. Þá barst tilkynning um innbrot í hverfi 109 en innbrotsþjófurinn var á brott er lögreglu bar að.
Einnig barst tilkynning um ljós á „glæfralegum stað“ í Úlfarsfelli eins og það er orðað í dagbókinni. Er lögreglan kannaði málið betur reyndust þetta vera fólk á skíðum.