Afmælisbarn dagsins er af betri endanum en það er Tvíhöfðinn sjálfur, Sigurjón Kjartansson. Ku hann vera 54 ára í dag.
Sigurjón lék með ýmsum pönksveitum í heimabæ sínum Ísafirði á sínum yngri árum en þekktastur er hann á tónlistarsviðinu sem hljómsveitarmeðlimur hinnar goðsagnakenndu rokksveitar Ham. Þá var hann einnig í böndum á borð við AnstæðA, Olympia og Jazzhljómsveit Konráðs Bé. Á leiksviðinu er Sigurjón þekktastur fyrir að vera meðlimur í vinsælustu gamanþáttum norðan heiða, Fóstbræðrum og sem annar Tvíhöfðabræðra. Afmælisbarnið hefur einnig getið sér gott orð sem handritshöfundur en hann skrifaði meðal annars handrit að þáttum á borð við Ófærð, Kötlu og Ástríði.
Sigurjón ætlar að hafa það rólegt í dag en í samtali við Mannlíf sagðist hann ekki ætla að fagna deginum sérstaklega: „Ekkert sérstaklega nei. Ætli það verði ekki kökusneið? Þetta er ekki stórafmæli. En jú, ég fékk dásamlegan morgunverð í morgun.“
En hvað er framundan hjá Sigurjóni?
„Bara allskonar, áramótaskaup. Já og svo verður Ham á Airwaives! Þannig að það er næsta mál á dagskrá.“
Mannlíf óskar hæfileikabúntinu Sigurjóni innilega til hamingju með enn eitt árið!