Framkvæmdastjóra Blaðamannafélags Íslands, Hjálmari Jónssyni hefur verið sagt upp störfum hjá félaginu, eftir ágreining á milli hans og formannsins.
Hjálmar Jónsson lenti í ágreiningi við formann BÍ, Sigríði Dögg Auðunsdóttur, í síðustu viku, en í morgun var hann boðaður á fund með Sigríði Dögg, Aðalsteini Kjartanssyni varaformanni BÍ og lögmanni félagsins þar sem honum var boðinn starfslokasamningur. Hjálmar þáði það ekki en ekki var óskað eftir því að hann ynni uppsagnarfrestinn. Hætti hann því störfum í dag.
Eins og Mannlíf hefur áður grein frá, svarar Sigríður Dögg ekki ítrekuðum spurningum miðilsins um ásakanir um skattaundanskot í tengslum við AirBnB leiguhúsnæði á vegum hennar og eiginmanns hennar. Viðurkenndi hún þó í færslu á Facebook að þau hjónin hefðu fengið „endurálagningu opinberra gjalda vegna útleigutekna“ og greitt af því skatt.
Sjá einnig: Sigríður Dögg svarar ekki ásökunum um skattaundanskot
Í samtali við Mannlíf segir Hjálmar að uppsögnin hafi komið flatt upp á hann. „Þetta bar allt að í morgun, mjög brátt. Ég er lyklalaus í fyrsta sinn í 22 ár.“
Þá segist Hjálmar hafa óskað eftir fundi með stjórninni svo hann gæti skýrt sína afstöðu. Vandar hann formanninum ekki kveðjurnar. „Það er óforsvaranlegt að Sigríður Dögg hafi ekki svarað spurningum Mannlífs um fjármál hennar. Ég óskaði eftir fundi með stjórninni en var neitað.“ Hjálmar bætti við að almennt stjórnleysi ríki hjá Blaðamannafélaginu.
Hjálmar hefur starfað fyrir félagið frá árinu 1989 en verið framkvæmdastjóri BÍ frá árinu 2003. Var hann formaður til ársins 2021 er hann ákvað að stíga til hliðar. Sigríður Dögg var svo kjörin í hans stað.
Hvorki náðist í Sigríði Dögg né Aðalstein Kjartansson við vinnslu fréttarinnar.
Mbl.is sagði fyrst frá málinu.