Í Grafarvoginum hefur verið að finna skemmtilegt framtak frá Pálínu Thorsteinsdóttur og dóttur hennar. Þær komu steinum fyrir meðfram strandlengjunni norðanmegin í Grafarvoginum. Á steinunum var að finna skemmtileg og sæt hvatningarorð fyrir alla þá sem gengu framhjá.
Þegar Pálína ætlaði að virða aftur fyrir sér steinana var búið að brjóta þá flesta eða fjarlægja þá. Meðlimir Facebook hópsins Íbúar Grafarvogs höfðu tjáð ánægju sína með þetta flotta framtak mæðganna, þess vegna var ekki skemmtilegt að komast að því að einhver hafi gert þetta.
Pálína segir í hópnum að ,,af 14 steinum sem ég hefði átt að sjá á göngu minni í morgun, voru tveir heilir og þrír brotnir, hinir níu voru hvergi sjáanlegir. Allt í allt voru 23 steinar settir á strandlengjuna og vona ég að eitthvað af þeim standi enn. En þar sem ég er mjög bjartsýn og jákvæð manneskja, þá vona ég bara að sá/sú sem tók steinana sem horfnir eru hafi þurft á þeim að halda og skreyti nú garðinn sinn með þeim.
Þetta var skemmtilegt verkefni sem við mæðgur létum verða af og það hitti í mark (hjá flestum) og þá erum við ánægðar þótt ég hefði viljað fá að njóta þess sjálf að ganga stíginn og lesa á þá aftur og aftur.”
Flestir í facebook hópnum tóku undir þessi orð.