Hollensku dýraverndunarsamtökin Dier & Richt hafa hafið undirskriftarsöfnun þar sem skorað er á framkvæmdastjórn Evrópusambandsinsi að banna með öllu að dregið sé blóð úr fylfullum hryssum. Með því verði stöðvað „vililmannlegt og hrottalegt ofbeldi“ á hrossum á íslenskum „blóðbæjum“.
Samtökin telja það bæði sýnt og sannað að blóðtakan leiði til hræðilegrar þrjáningar dýranna. Mannlíf greindi fyrst frá illri meðferð blóðmera hér á landi.
Sjá einnig: Rúmlega milljarðs hagnaður í skugga dýraníðs – „Go back to your country“
Gífurlegur hagnaður
Líftæknifyrirtækið Ísteka hagnaðist um rétt tæpar 600 milljónir króna á síðasta ári vegna blóðtöku úr fylfullum hryssum til framleiðslu á frjósemislyfjum sem selt er til stórra lyfjafyrirtækja um allan heim. Þennan rúma hálfa milljarð græddi fyrirtækið í skugga skelfilegrar meðferðar á hryssunum, líkt og Mannlíf greindi fyrst frá um síðastliðna helgi.
Í ársreikningi fyrirtækisins, sem Mannlíf hefur undir höndum, má sjá að fyrirtækið hagnaðist í fyrra um tæpar 600 milljónir, eða 591.889.767 krónur fyrir þá sem hafa gaman af tölum. Árið þar á undan var hagnaðurinn svipaður, eða rétt rúmur hálfur milljarður, og því hefur Ísteka grætt rúman milljarð á tveimur árum vegna blóðmeranna þar sem sýnt hefur verið fram á augljóst dýraníð.