Skotið var inn um þrjár rúður í fjölbýlishúsum í Kórahverfinu í Kópavogi í vikunni. Skotárásirnar fóru fram að næturlagi og var skotið inn um rúður í tveimur íbúðum. Á öðrum staðnum hafnaði byssukúlan í borðstofuborði.
Samkvæmt tilkynningu frá lögreglunni á höfuðborgarsvæðinu var íbúum eðlilega mjög brugðið við skorárásirnar. Lögregla rannsakar nú hvort lofbyssa hafi verið notuð í verknaðinn og biður alla þá sem geta veitt upplýsingar að hafa samband hið fyrsta.
Svona hljóðar tilkynning lögreglunnar:
„Lögreglan á höfuðborgarsvæðinu er nú með til rannsóknar tvö tilvik þar sem skotið var á þrjár rúður í tveimur íbúðum í fjölbýlishúsum í Kórahverfinu í Kópavogi að næturlagi fyrr í vikunni. Á öðrum staðnum fór kúla í gegnum rúðuna og hafnaði í borðstofuborði. Húsráðendum var eðlilega mjög brugðið vegna þessa, en talið er að loftbyssa hafi verið notuð við verknaðinn.
Þau sem kunna að búa yfir upplýsingum sem geta varpað ljósi á málið eru vinsamlegast beðin um að hafa samband við lögreglustöðina á Dalvegi 18 í Kópavogi í síma 444 1000.“