Starfshópur skipaður um uppbyggingu 5G

Deila

- Auglýsing -

Samgöngu- og sveitarstjórnarráðuneytið hefur skipað starfshóp um örugga uppbyggingu 5G-kerfisins. Starfshópurinn er settur á fót í þeim tilgangi að fylgja eftir stefnumótun og aðgerðum, annars vegar til að tryggja nauðsynlegan fjölbreytileika sendabúnaðar farneta og hins vegar til útfærslu á skilgreiningu á hvaða afmörkuðu þættir kerfa geti helst flokkast sem viðkvæmir vegna erlendrar eða innlendrar öryggissamvinnu. Kemur þetta fram á vef Stjórnarráðsins.

Skipan hópsins tengist frumvarpi til nýrra laga um fjarskipti sem samgöngu- og sveitarstjórnarráðherra lagði fram á Alþingi í vor, en í því var sérstakt ákvæði um öryggi 5G fjarskiptakerfa. Frumvarpið verður lagt fram aftur í haust. Ákvæðið, sem er 87. gr. frumvarpsins, varðar þær ráðstafanir sem stjórnvöld geta gripið til við þróun og uppbyggingu farneta í íslenskri lögsögu  vegna áhættuþátta er varða brýna almannahagsmuni og öryggi.

Starfshópurinn er skipaður Ingu Þóreyju Óskarsdóttur frá dómsmálaráðuneyti, Páli Þórhallssyni frá forsætisráðuneyti, Veturliða Þór Stefánssyni frá utanríkisráðuneyti og Sigurði Emil Pálssyni, formanni hópsins, frá samgöngu- og sveitarstjórnarráðuneyti. Skipunartími hópsins er til 31. desember 2021.

 

- Advertisement -

Athugasemdir