Góð vika – strákarnir okkar
Fáir hafa eins mikla ástæðu til að gleðjast þessa vikuna og íslenska karlalandsliðið í handbolta. Liðið fór vel af stað með stórkostlegum sigri gegn sjálfum ríkjandi heims- og Ólympíumeisturum, Dönum, eftir spennandi viðureign og Aron Pálmarsson sýndi af hverju hann er talinn vera einn besti leikmaður heims um þessar mundir, eftir að hafa skorað 10 mörk í 17 skotum. Ekki tók svo verra við þegar Íslendingar beygðu rússneska björninn í leiknum gegn Rússum þar sem Ísland sigraði með ellefu marka mun, 34-23. Og þrátt fyrir tap gegn Ungverjum hafa strákarnir okkar heilt yfir sýnt frábæra takta á EM; Aron og Alexander Petersson komust í fámennan hóp leikmanna með hundrað mörk í lokakeppni EM í leiknum gegn Ungverjum og liðið komst í milliriðil. Fyrsti leikur Íslands í riðlinum verður gegn Slóveníu í dag, föstudag, og því um að gera að kveikja á tækinu og fylgjast með. Áfram Ísland! HÚH!
Slæm vika – Svandís Svavarsdóttir
Við sækjum í heim stjórnmála í þessari viku því eflaust hafa fáir fengið að kenna jafnmikið á því og Svandís Svavarsdóttir heilbrigðisráðherra. Svandís hefur verið í skotlínunni vegna bágs ástands á bráðamóttöku Landspítalans og gagnrýnd fyrir aðgerðarleysi og skilningsleysi á ríkjandi vanda. Gremjan í garð ráðherra náði hámarki eftir fund hennar með læknaráði þar sem Svandís er sögð hafa talað niður til heilbrigðisstarfsfólks sem hefur vakið athygli á hörmulegum aðstæðum á deildinni. Eftir fundinn sagðist formaður stjórnar læknaráðs vera hissa á viðbrögðum ráðherra og í kjölfarið hefur Svandís fengið að heyra það. Þannig sagði þingmaðurinn Helga Vala Helgadóttir viðhorf ráðherra vera „alvarlegt mál“ og rithöfundurinn Illugi Jökulsson lét þau orð falla að Svandís „væri horfin inn í völundarhús hrokans þar sem staða hennar sjálfrar sem ráðherra skiptir jafnmiklu eða meira máli en neyðin í heilbrigðiskerfinu“ – sem er ekki beint falleg umsögn.