Strákarnir okkar sýndu frábæra takta

Deila

- Auglýsing -

Ísland vann frábæran sigur á Danmörku, 30-31, í fyrsta leik sínum á EM 2020.

 

Íslenska karlalandsliðið í handbolta sigraði Dani í þrususpennandi leik í Malmö fyrr í kvöld. Var staðan í hálfleik jöfn, 15-15, en í seinni hálfleik var íslenska liðið sterkara.

„Við héldum haus allan tímann, þetta var ekki einfalt verkefni eins og gefur að skilja á móti Ólympíu- og heimsmeisturum á heimavelli, þetta var eins og þeirra heimavöllur með alla áhorfendur hér á bakvið sig nema stórkostlega Íslendinga hérna, þúsund Íslendinga sem voru að hjálpa okkur og það er ómetanlegt,“ sagði Guðmundur Guðmundsson, þjálfari liðsins í samtali við RÚV eftir leikinn, en hann var eðlilega ánægður með sigurinn.

Aron Pálmarsson þótti eiga magnaðan leik í viðureigninni við Dani, en hann skoraði tíu mörk og gaf níu stoðsendingar. Danir höfðu möguleika á að jafna stöðuna í lokasókn sinni en Björgvin Páll Gústavsson markvörður íslenska liðsins varði skot Mikkels Hansen beint úr aukakasti.

Guðmundur sagði þó mikilvægt að menn hefðu fæturna á jörðinni þrátt fyrir úrslitin, í ljósi þess að Ísland hóf síðustu tvö Evrópumót á því að vinan sterka sigra á Norðurlandaþjóðum en hafi svo verið úr leik eftir það. „Ísland hefur áður lent í því að vinna fyrsta leik á EM og síðan lent í ógöngum. Núna er það okkar að fylgja þessum leik eftir,“ sagði hann á RÚV.

Þess má geta að Ísland er með tvö stig í E-riðli líkt og Ungverjaland.

- Advertisement -

Athugasemdir