Á vegum Icelandair verða 844 sæti í boði til Tenerife í hverri viku eftir áramót. Til viðbótar við þann sætafjölda flýgur Play líka vikulega til eyjarinnar fögru og hið sama má segja um leiguflug á vegum ferðaskrifstofanna Heimsferðir, Plúsferðir, Sumarferði og Úrval-Útsýn.
„Við höfum fundið að það er mikil uppsöfnuð ferðaþörf hjá fólki og virðast sólarfrí vera ofarlega á lista margra. Þar er Tenerife auðvitað frábær valkostur en við sjáum líka mikla eftirspurn til Orlando eftir að Bandaríkin opnuðu aftur,” sagði Ásdís Pétursdóttir, upplýsingafulltrúi Icelandair, í samstali við Túrista.
Flugáætlun Icelandair til Tenerife gerði upphaflega ráð fyrir tveimur flugum í viku en vegna gífurlegrar eftirspurnar var tveimur flugum bætt við. Nú er svo komið að fjórar þotur flugfélagsins fljúga til eyjarinnar og gera það með tíu mínútna millibili á miðvikudags- og laugardagsmorgnum. Og til að mæta eftirspurninni þá stefnir Icelandair á að nota breiðþotur í helming ferðanna.