Þriðji dagurinn í röð þar sem ekkert nýtt smit greinist

Heildarfjöldi staðfestra COVID-19 smita er áfram 1.799 hér á landi. Ekkert nýtt smit hefur greinst á síðasta sólarhring hér á landi. Þetta er þriðji dagurinn í röð þar sem ekkert nýtt smit greinist.

Virkum smitum fer áfram fækkandi á milli daga en virk smit eru komin niður í 39 í gær. Virk smit voru 48 daginn áður, mánudag.

Í gær voru 40 sýni rannsökuð á sýkla- og veirufræðideild Landspítalans. Þá voru 278 sýni rannsökuð hjá Íslenskri erfðagreiningu í gær.

Nú hafa 1.750 einstaklingar náð bata eftir að hafa smitast samkvæmt tölum á covid.is.

Almannavarnadeild ríkislögreglustjóra boðar til upplýsingafundar klukkan 14.00 í dag. Gestur fundarins verður Páll Matthíasson, forstjóri Landspítala.