Enn vindur risastóra kókaínmálið upp á sig og rannsókn er í fullum gangi. Gæsluvarðhald yfir þremur af meintum smyglurum í 100 kg kókaínmálinu rennur út í dag, 14. september. Einn fjórmenninganna sætir afplánun vegna fyrri brota og því í öruggu haldi lögreglu.
Grímur Grímsson yfirlögregluþjónn staðfesti að ákvörðun hefði verið tekin um framhaldið á 100 kílóa kókaínmálinu: „Já, það verður sem sé óskað eftir framlengingu á gæsluvarðhaldi í dag yfir þremur sakborninganna í þessu máli.“
Vert er að benda á að gæsluvarðhald er tímabundin frelsissvipting sem beitt er í þágu rannsóknar eða meðferðar sakamáls á grundvelli dómsúrskurðar þegar tiltekin skilyrði eru fyrir hendi. Héraðdómur tekur málið fyrir í dag. Líklegt er að krafa lögreglunnar verði samþykkt.
Málið er það stærsta sem komið hefur til kasta íslensku lögreglunnar. Fundist hafði áður óheyrt magn af kókaíni í gámi með timbri sem kom frá Brasílíu í Sundahöfn. Timbursendingin hafði viðkomu í Hollandi. Tollverðir þar í landi fundu efnið og létu íslensk yfirvöld vita. Viðtakandi sendingarinnar, reykvískur timbursali, var handtekinn þegar hann vitjaði innihalds gámsins. Aðild hans að málinu kemur mjög á óvart. Hann á að baki sorgarsögu þar sem sonur hans lét lífið vegna ofneyslu eiturlyfja. Mannlíf fjallaði um mál timbursalans. Sjá hér.
Upphaf málsins var að þann 17. ágúst birtist eftirfarandi frétt á heimasíðu lögreglunnar: „Þrír aðilar voru í dag í Héraðsdómi Reykjavíkur úrskurðaðir í fjögurra vikna áframhaldandi gæsluvarðhald, eða til 14. september, í þágu rannsóknar lögreglu á innflutningi á miklu magni af fíkniefnum. Einn til viðbótar sat í gæsluvarðhaldi vegna málsins, en sá hefur verið færður í afplánun vegna annarra mála. Um er að ræða tæplega 100 kg af kókaíni sem var falið í vörusendingu á leið til landsins. Málið er tilkomið vegna frumkvæðisrannsókna á skipulagðri brotastarfsemi og miðar rannsókn þess vel.“