Hagstofan birti nýja verðbólgumælingu sína í morgun og samkvæmt henni er verðbólgan komin í 7,2 prósent og hefur farið vaxandi í hverjum mánuði frá því í ágúst. Hún hefur ekki verið meiri frá því í maí árið 2010.
Þá gerði Seðlabankinn ráð fyrir 5,8 prósenta verðbólgu á fyrsta fjórðungi þessa árs og 5,6 prósent á öðrum ársfjórðungi. Landsbankinn gaf frá sér verðbólguspá fyrir hálfum mánuði síðan þar sem hann spáði því að verðbólga næði hámarki í júní og yrði þá komin í sjö prósent.
Húsnæðiskostnaður hækkaði um 2,4 prósent og olli 0,45 prósenta hækkun á vísitölunni. Flugfargjöld til útlanda hækkuðu um 22,9 prósent í verði og olli það 0,37 prósenta hækkun á vísitölunni.
Neysluverðsvísitalan sem mælir verðbólgu hækkaði um 1,25 prósent í síðasta mánuði. Það er mesta hækkun í einum mánuði frá því í febrúar árið 2013. Húsnæðiskostnaður, flugfargjöld og verð á matar- og drykkjarkostnaði, einkum mjólkur, ráða mest um aukna verðbólgu.
Samkvæmt hagstofunni hefur verð á mat- og drykkjarvörum hækkað um 1,4 prósent milli mánaða og stóð hækkandi verð á mjólkurafurðum undir tveimur þriðju hlutum þeirrar hækkunar. Samanlagt hækkaði það neysluverðsvísitöluna um 0,20 prósent.
Verðbólgan er meiri en spáð var í síðustu þjóðhagsspá Seðlabankans. Hún var hins vegar gerð snemma í febrúar fyrir innrás Rússa í Úkraínu, en innrásin hefur ollið margvíslegum verðhækkunum á alþjóðamarkaði.
Athugasemdir