Það getur kostað þig 100 prósentum meira að versla augabrúnalyftingu hjá dýrustu snyrtistofunni á höfuðborgarsvæðinu, miðað við þá ódýrustu. Í Grafarvogi getur þú fengið meðferðina á 7.000 krónur en dýrasta meðferðin kostar tvöfalt meira, eða 14 þúsund krónur.
Ef við reiknum með því að einstaklingur fari annan hvern mánuð í augabrúnalyftingu þá getur viðkomandi sparað sér 42 þúsund á ári með því að versla við ódýrustu stofuna. Fyrir það getur viðkomandi fengið sér til að mynda sjö litla rjómaísa í brauði með ídýfu í mánuði eða 85 slíka á árinu.
Svokallað brow lamination eða brow lift hefur verið að ryðja sér til rúms undanfarið í snyrtivöruheiminum og virðist ekkert lát þar á.
Um er að ræða nokkurskonar permanent fyrir augabrúnir, þó tilgangurinn sé sannarlega ekki að krulla brúnirnar, heldur móta þær og greiða á ákveðinn hátt með svipaðri tækni, svo þær haldist þannig. Sömuleiðis er hægt að fara í samskonar meðferð á augnhárum, svokallað lash lift.
Meðferðin er nokkuð ný af nálinni á Íslandi, en vinsældir hennar hér á landi hafa aukist hratt í rúmlega ár, eða þar um bil.
Þykkar og miklar augabrúnir hafa verið í tísku síðustu ár og í kjölfarið vaknaði gamalt förðunartrend af værum blundi: sápubrúnir (e. soap brows). Það virkar nokkurn veginn eins og það hljómar: sápustykki er notað sem gel fyrir augabrúnirnar og sápan greidd í með augabrúnabursta, til þess að móta brúnirnar og fá þær til að sýnast fyllri og meira… flöffí?
Brow lift, eða augabrúnalyfting eins og meðferðin verður kölluð í þessari grein, er í raun meðferð sem nær fram líku útliti og er svo vinsælt að öðlast með sápustykkinu, en virkar á svipaðan hátt og permanent og endist því vikum saman – allt upp í sex vikur. Endingin er þó einstaklingsbundin.
Í ljósi gríðarlegra vinsælda augabrúnalyftinga síðustu misseri, fór Mannlíf á stúfana og kannaði hvernig tíu snyrtistofur á höfuðborgarsvæðinu verðsetja meðferðina. Kannað var annars vegar verð á augabrúnalyftingu einni og sér og hinsvegar verð á augabrúnalyftingu ásamt litun brúnanna og plokkun/vaxi.
Sumar af stofunum buðu einungis upp á annan þessara tveggja möguleika – augabrúnalyftingu eina og sér eða augabrúnalyftingu með litun og plokkun/vaxi.
Í ljós kom að snyrtistofan Royal Beauty var með lægsta verðið á augabrúnalyftingu. Stofan, sem staðsett er í Grafarvogi, býður meðferðina á 7.000 krónur.
Dýrasta stofan, þegar kemur að augabrúnalyftingu einni og sér, er Dekurstofan (Hjá Sunnu), sem staðsett er í Kringlunni. Þess ber þó að geta að hún er mjög naumlega dýrari en Laugar Spa, en Dekurstofan verðsetur meðferðina á 11.000 krónur, á meðan meðferðin kostar 10.990 krónur hjá Laugar Spa.
Stofurnar Dimmalimm, Paradís og Snyrtistofan Fegurð bjóða ekki upp á augabrúnalyftingu eina og sér á verðskrá sinni, heldur einungis með litun og plokkun/vaxi inniföldu í verði.
Þegar kemur að besta verðinu á augabrúnalyftingu ásamt litun og plokkun/vaxi er snyrtistofan Paradís langódýrust, en stofan býður þennan pakka á 9.000 krónur. Þar sem Paradís er ekki með augabrúnalyftingu eina og sér í verðskránni sinni, náði hún ekki á blað í þeim lið, þó reikna megi með að þar væri stofan annað hvort ódýrust eða í öðru sæti, ef verðhlutfallið væri svipað.
Dýrasta stofa þeirra tíu sem skoðaðar voru, í þessum pakka, er aftur Dekurstofan (Hjá Sunnu), með verðmiða upp á 14.000 krónur. Snyrtistofan Fegurð og Snyrtistofan Kopar eru þó litlu ódýrari, en sú fyrri býður meðferðina á 13.500 krónur og sú seinni á 13.490 krónur.
Þær snyrtistofur sem ekki eru með augabrúnalyftingu, litun og plokkun/vax í einum pakka í verðskrá sinni eru Laugar Spa, Royal Beauty og Beauty Salon.
Þess ber að geta að verðkönnunin segir ekkert um gæði meðferðanna. Einungis viðskiptavinir þeirra stofa sem eru í verðkönnuninni geta vitnað um gæðin, þjónustuna og endingu meðferðarinnar.