Verkalýðsforkólfurinn Vilhjálmur Birgisson segir að „eins og ég hef fjallað um áður þá er gefin út svokölluð samræmd vísitala í hverjum mánuði þar sem hún er mæld með nákvæmlega sama hætti í öllum löndum innan ESB.“
Bætir við:
„Eini munurinn á þessari mælingu og íslensku vísitölunni er að ekki er inni svokallað eigið húsnæði í samræmdu vísitölunni. Eins og sést á þessari mynd (að ofan) er einungis eitt land innan ESB sem er með lægri verðbólgu en er hér á Íslandi en það er Sviss.“
Vilhjálmur bendir á að „íslenska verðbólgan er 9.3% en samræmda 5.5% eins og kemur fram á þessari mynd.
Þrátt fyrir þessar bláköldu staðreyndir eru stýrivextir á Íslandi nánast þeir hæstu af öllum löndum innan ESB og fjármálakerfið öskrar á frekari stýrivaxtahækkanir. Það blasir við að það þarf að breyta mælingunni á vísitölunni, sérstaklega í ljósi þess að nánast allt í íslensku umhverfi er verðtryggt en slíkt þekkist ekki í öðrum löndum og við erum með eina hæstu vextina af þeim löndum sem við viljum helst bera okkur saman við sem hefur kostað íslensk heimili gríðarlega fjármuni að undanförnu.“