Aðdáendur Sálarinnar þrýsta nú á að hljómsveitin snúi aftur og haldi risatónleika til að fagna 35 ára afmæli sveitarinnar.
Sálin hans Jóns míns er ein allra vinsælasta hljómsveit Íslandssögunnar en lög þeirra hafa lifað með þjóðinni í áratugi. Dugir að nefna lög eins og Sódóma, Þú fullkomnar mig, Vængjalaus, Hvar er draumurinn? og Kanínan en listinn er þvert á móti tæmandi. Böll hljómsveitarinnar þóttu einnig stórkostleg og ófáir Íslendingar sem eiga frábærar minningar frá þeim.
Þrátt fyrir gífurlegar vinsældir hætti hljómsveitin árið 2018 en hún hélt kveðjutónleika í Hörpu það ár. En nú eru blikur á lofti.
Nú þegar 35 ár eru frá stofnun Sálarinnar sálugu, hafa aðdáendur Stefáns Hilmarssonar og félaga hans tekið málin í sínar hendur og stofnað Facebook-hóp sem hefur það markmið að fá hljómsveitina til að snúa úr hinum helga steini til að halda veglega afmælistónleika. Ber hópurinn einfaldlega nafnið Sálin 35 ára.
Hátt í 500 manns eru í hópnum sem fer stækkandi með hverri mínútunni.
„Það er kominn tími til þess að Sálin setji vélarnar í gang ! Þann 10 mars á næsta ári er bandið 35 ára og það þarf að halda uppá. Ekki er ráð nema í tíma sé tekið og við skorum hér með á þá að efna til veglegrar afmælisveislu/tónleika þar sem við getum öll komið saman og haft gaman.“
Þjóðþekktir einstaklingar eru meðal aðdáenda í hópnum en útvarpsmaðurinn handlagni, Gulli Helga er einn af þeim en hann skrifaði færslu þar sem hann hvetur Sálina áfram: „Einn tveir!!…,“
Annar útvarspmaður frá Bylgjunni, Ívar Guðmundsson skrifaði einnig færslu í hópnum: „Sem einn af stórum hópi aðdáenda þá segi ég, oft hefur verið minna tilefni :).“
Og nú er bara að bíða og sjá hvernig strákarnir í Sálinni hans Jóns míns taki í endurkomu hugmyndina.