Lögreglan á höfuðborgarsvæðinu þurfti að sinna óvenjulegu útkalli í vikunni. Áhyggjufullur vegfarandi hafði samband vegna lunda, sem af einhverjum ástæðum var á vappi í Suðurhlíðunum í Reykjavík.
„Ekki fylgdi tilkynningunni hvort hann væri særður,“ segir í færslu lögreglu um lundann hugaða.
„Við sendum að sjálfsögðu tvo lögreglumenn snarlega á staðinn til að kanna málið frekar. Eftir stutta leit fannst lundinn. Hann var ánægður að sjá okkur og var hinn gæfasti í höndum lögreglu.“
Ákveðið var að fara með lundann ljúfa í Húsdýragarðinn á fund dýrahirðis, sem að sögn lögreglu tók vel á móti honum og ætlaði að gera viðeigandi ráðstafanir.
Á öllum lýsingum virðist lundinn hafa verið mikið gæðablóð og honum og lögregluþjónunum orðið vel til vina.
„Lundinn var mjög rólegur og hæstánægður með bílferðina í lögreglubílnum.
Sum útköll eru einfaldlega skemmtilegri en önnur og það má svo sannarlega segja um þetta útkall,“ segir að lokum í tilkynningunni áður en landsmönnum er óskað góðrar helgar.
Vegfarandinn sem hringt hafði á lögreglu vegna lundans skrifar í athugasemd við færsluna að hún hafi næstum verið búin að hjóla á hann.
„Hann tók ekki í mál þrátt fyrir strangar samningaviðræður að fara í átt að sjónum og stefndi í allt aðra átt svo mér fannst vissara að hann kæmist í smá tékk áður en hann yrði undir einhverju farartæki. Gott að heyra að hann hafi komist í góðar hendur.“