Vítalía gefur skýrslu hjá lögreglu

Vítalía Lazareva hefur gef­iið skýrslu hjá lög­reglu vegna kæru sinnar á hendur þeim Þórði Má Jóhann­essyni, Hregg­viði Jónssyni og Ara Edwald.

Lögmenn mann­anna þriggja lýstu því yfir við fjöl­miðla nýverið að engin kæra hefði verið lögð fram gegn þeim vegna meints kyn­ferð­is­brots í sum­ar­bú­stað í Skorra­dag í des­em­ber árið 2020. Þetta sögðu lög­menn­irnir í kjöl­far þess að menn­irnir kærðu þau Vítalíu og Arnar Grant fyrir til­raun til fjár­kúg­unar. Áður hafði komið fram að Vítalía Lazareva hefði lagt fram kæru á hendur mönn­unum en væri ekki búin að fara í skýrslu­töku.

Mikið fjaðrafok varð í fjöl­miðlum eftir að menn­irnir þrír lögðu fram kæru sína og síðar eftir að full­yrt var að engin kæra á hendur þeim vegna kyn­ferð­is­brots lægi fyrir. Vítalía lýsti því yfir á Twitter að hún hefði ekki vitað betur en að málið væri í ferli; að hún hefði fyllt út form vegna máls­ins og farið yfir mála­vexti, skrif­lega.

Samkvæmt heim­ildum gaf Vítalía form­lega skýrslu vegna máls­ins síð­ast­lið­inn mánu­dag.

Vítalía Lazareva kom fram í hlað­varps­þætt­inum Eigin konur í jan­úar síð­ast­liðnum og lýsti þar meðal ann­ars kyn­ferð­is­of­beldi sem hún sagð­ist hafa orðið fyrir af höndum þriggja þjóð­þekktra, áhrifa­manna í sam­fé­lag­inu, í sum­ar­bú­stað sem hún var stödd í með þáver­andi kærasta sínum, Arnari Grant. Hún nafn­greindi menn­ina ekki í þætt­inum en hafði þó gert það á Instagram í októ­ber á síð­asta ári. Málið fór hátt í fjöl­miðlum og að end­ingu stigu þeir Þórður Már Jóhann­es­son, Hregg­viður Jónsson og Ari Edwald allir til hliðar eða hættu í stöðum sínum; Þórður Már sem stjórn­ar­for­maður Festar, Hregg­viður úr stjórn Veritas og Ari sem fram­kvæmda­stjóri Ísey útflutn­ings.

Áður hefur komið fram að þögg­un­ar­samn­ingar hafi verið á borð­inu í máli Vítalíu og þre­menn­ing­anna. Þeir voru sagðir hafa viljað ljúka mál­inu utan dóm­stóla og greiða Vítalíu ákveðna upp­hæð fyrir það. Í kæru þeirra á hendur þeim Vítalíu og Arnari Grant kemur fram að þau hafi reynt að knýja fram 150 millj­ónir vegna máls­ins. Stundin greindi fyrst frá mál­inu.

Arnar Grant kom fram í við­tali við RÚV síð­ast­lið­inn föstu­dag og sagð­ist þar hafna öllum ásök­unum mann­anna um fjár­kúgun. Hann hafði áður sent frá sér yfir­lýs­ingu þar sem hann sagði kæru mann­anna frá­leita til­raun til þess að afvega­leiða umræð­una. Hann sagði einnig að um væri að ræða til­raun til þess að draga úr trú­verð­ug­leika hans sjálfs sem lyk­il­vitnis í máli Vítalíu.