Íris Hlín Bjarnadóttir hundaræktandi er komin með lögregluna með sér í liði til að finna hrottann sem eitraði fyrir tveimur verðlauna Scheffer-hundum hennar. Hundarnir lifðu af en hún óttast að eitrunaráhrif eigi eftir að koma fram.
Íris var í áfalli eftir að hún komst að því í gærmorgun að einhver hafði kastað kjöti blönduðu með rottueitri inn í garð hennar um nóttina. Tveir hundar hennar komust í kjötið og eru þeir nú í meðferð hjá dýralækni. Írís ræktar Scheffer-hunda og er með nokkra á heimilinu.
Í ljósi þess að Íris er hundaræktandi og eigandi verðlaunahunda verður að teljast líklegt að þetta sé ekki handahófskennd illska. Í samtali við Mannlíf sagðist hún sannfærð um að hér væri á ferðinni hefnaraðgerð. „Ég er bara rosalega hrædd,“ sagði Íris.
Í gærkvöldi ritaði Íris svo færslu á Facebook þar sem hún þakkaði allan hlýhuginn sem henni var sýndur.
„Takk fyrir hlýjar kveðjur. Vorum að koma heim og hvíld ráðlögð næstu daga. Hundarnir eru á lífi en verða undir eftirliti næstu 3 vikur þar sem þetta er langverkandi eiturefni, þ.e.a.s. eitrunaráhrif gætu komið fram einhvern tímann á þeim tíma. Erum með lögreglu og fleiri góða aðila með okkur í liði sem munu aðstoða okkur í að finna þennan hrotta.“