Ingifríður R. Skúladóttir, eigandi Íslendingabarsins Bar-inn á Tenerife, hefur ákveðið að skella í lás. Kveðjukvöld staðarins verður haldið næstkomandi föstudagskvöld og þar með lýkur tæplega tveggja ára sögu staðarins.
Þetta auglýsir Ingifríður á Facebook-síðu staðarins. „Síðasta skiptið enn …..Bar-Inn lokar. Síðasta kvöldið er föstudagskvöldið 29.01.2021. Kveðjum með hvelli,“ segir Ingifríður.
Ingifríður stofnaði Bar-inn með Guðmundi Guðbjartssyni veitingamanni sem lést langt fyrir aldur fram, aðeins 53 ára gamall, skömmu eftir opnun staðarins. Hann þjáðist af sykursýki. Svo skall Covid-19 faraldurinn yfir og Ingifríður þurfti þá að loka tímabundið vegna allsherjar útgöngubanns á Tenerife. Síðastliðið sumar náði hún loksins að opna aftur.
Eins og Mannlíf hefur fjallað um þá sitja margar íslenskar fjölskyldur í sárum á Tenerife eftir að allir íslenskir ferðamenn voru reknir af eyjunni í mars síðastliðnum vegna COVID-19. Fjölskyldurnar hafa lífsviðurværi sitt af þjónustu við Íslendinga og bíða spenntar eftir því að þeir fari að streyma aftur til þessa vinsæla viðkomustaðar þjóðarinnar.
Þau sögulegu tíðindi áttu sér stað í október að Íslendingabarinn Nostalgía opnaði á nýjan leik á Tenerife. Eigendur staðarins segja flesta rekstaraðila á eyjunni kanarísku berjast í bökkum og íslenskir bareigendur eru þar engin undantekning.