Damon Albarn, hinn heimsfrægi tónlistarmaður, hefur gert samning við útgáfufyrirtækið Transgressive Records sem mun gefa út aðra sólóskífu kappans, en sú fyrsta sem Damon sendi frá sér, árið 2014, heitir Everyday Robots.
Ekki er enn komin dagsetning á nýju plötunni og hún hefur heldur ekki fengið nafn.
Útgáfufyrirtækið er í skýjunum vegna þessa samnings enda Damon einn vinsælasti tónlistarmaður heims; hefur selt tugi milljóna platna með Blur, Gorillaz, The Good, Bad and the Queen, auk áðurnefndrar sólóplötu.
Damon fékk íslenskan ríkisborgararétt í byrjun þessa árs. Hann hefur búið á Íslandi – á einnig heimili í Englandi – frá árinu 1996 og á fallegt einbýlishús í Grafarvogi.
Damon hefur margoft talað opinberlega um hversu vel honum líði á Íslandi og hversu mikið hann elski landið, því hér á landi fær hann mun meiri frið en í Englandi. Hefur hann borið hróður Íslands víða um heim.
Hinn íslenski Damon Albarn heldur því áfram að skapa tónlist sem milljónum manna fellur vel í geð.