Jóhannes Haukur Jóhannesson leikari stendur í ströngu við að sannfæra ungan son sinn um tilvist jólasveinanna. Það er án efa eitthvað sem margir kannast við. Jóhannesi virðist hafa tekist ætlunarverkið ef marka má meðfylgjandi myndband.
Myndbandið birti Jóhannes á Facebook-síðu sinni þar sem hann fjallar nánar um efasemdir sonarins um tilvist jólasveinannna. „Hann Stefán minn (9 ára) var farinn að efast um tilvist jólasveinanna og ákvað að reyna að ná myndbandi af Stekkjastaur í nótt. Hann setti upp síma á upptöku og fór að sofa. Hann vakti mig svo eldsnemma í morgun og sýndi mér að síminn hefði slökkt á sér eftir rúma klukkutíma upptöku. En þó má sjá rétt í lokin á myndbandinu ófrávíkjanlegar sannanir um, ekki bara tilvist jólasveinanna, heldur líka um einhverskonar töframátt sem þeir virðast búa yfir. En Stekkjastaur tekst hreinlega að slökkva á upptökunni úr fjarlægð. Ég leyfi myndbandinu að tala sínu máli,“ segir Jóhannes.
Undir færslunni taka margir til máls sem langflestir hrósa Jóhannesi fyrir vel unnin störf. Flestir þeir á mælendaskránni kannast við þetta vandamál og segja að myndbandið hafi einnig fengið þeirra börn til að trúa á tilvist jólasveinsins.