Jón Ásgeir Jóhannesson, stjórnarformaður Skeljar, er á því að það sé einföld ástæða fyrir að fjárfesting erlendra aðila á Íslandi sé miklu minni en á hinum Norðurlöndunum; íslenska krónan.
Kemur þetta fram í nýrri ársskýrlu Skeljar, en það er Viðskiptablaðið sem greindi fyrst frá.
„Það er ekki vegna þess að það sé skortur á afli, þekkingu, hugviti eða dugnaði í íslensku atvinnulífi, heldur er skýringuna að finna í íslensku krónunni, sem er versti óvinur atvinnulífsins og fólksins í landinu – en meira um það síðar,“ segir Jón Ásgeir í skýrslunni áðurnefndu.
Hann vonast til að Skel geti lokkað til sín innlenda og erlenda fjárfesta til að fjárfesta á Íslandi.
Óhætt er að segja að árið 2022, hjá Skel, hafi verið afar viðburðaríkt; en félagið er nú orðið fullburða fjárfestingafélag.
„Þegar litið er til baka er ljóst að vegferðin var viðameiri en upphaflega var gert ráð fyrir. Með mikilli þrautseigju starfsmanna náðist að skera á samofna strengi milli þeirra. Um mitt ár voru félögin farin að geta horft fram á veginn með skýra stefnu að verða hvert og eitt best á sínu sviði. Ég leyfi mér að fullyrða að vel hafi tekist til og náðst hafi að hrista sofandaháttinn af þeim, sem einkenndi þessar rekstrareiningar að ákveðnu leyti meðan þær voru allar samofnar.“
Þess má geta að fyrirtækið Skel hagnaðist um 17,5 milljarða króna í fyrra.