Það er ekki bara á Íslandi sem Covid-smitum fjölgar, heldur segir WHO, eða Alþjóðaheilbrigðismálastofnunin, að bakslag sé komið í slagnum við Covid-19 og að í þeim slag séum við jarðarbúar að tapa nokkuð stórt eins og er.
Hér til Íslands streyma nú ferðamenn í stórum stíl og það virðist vera taktur í fjölgun ferðamanna og fjölgun smita.
Kári Stefánsson er áhyggjufullur vegna þeirra Covid-smita sem blossað hafa upp hér á landi síðustu daga. Hann segir fulla ástæðu til að vera á verði og nefnir að „það var tekin ákveðin meðvituð áhætta þegar hætt var að skima á landamærum í lok síðasta mánaðar og það var í raun og veru nauðsynlegt að taka hana. Við urðum að prófa hvort við gætum búið við eðlilegar kringumstæður í þessu samfélagi,“ en Kári vill ekki fullyrða um að við höfum fallið á því prófi.
Hann vill ekki meina að sú tilraun hafi endilega mistekist en að við verðum að vera undirbúin til að grípa skjótt til aðgerða ef stórt hópsmit kemur upp.
Hann bendir á að „það fæst ekki nema 80 til 90 prósent vörn við bólusetningu og þeir sem eru fullbólusettir geta sýkst á nýjan leik án þess að veikjast og geta þar af leiðandi gengið með veiruna og breitt hana út án þess að vera sjálfir varir við að þeir hafi smitast; þannig það eru alls kyns hlutir sem verður að hyggja að; við verðum nú að fara undirbúa stofnanir samfélagsins sem kunna að þurfa bregðast við þessu, svo sem sjúkrahús, hjúkrunarheimili og skóla.“
Samkvæmt WHO, og á það jafnt við okkur Íslendinga og umheiminn, fer nú smitum fjölgandi í heiminum
Eftir afléttanir og gleði og bjartsýni – níu vikna tímabil þar sem smitum og dauðsföllum fór fækkandi – er faraldurinn á uppleið.
Á heimsvísu hefur smitum fjölgað um 10% – en rúmlega 3 milljónir smita hafa greinst á undanförnum sjö dögum.
Ástæðan fyrir upprisu veirunnar á heimsvísu er rakin til vegna þess hversu fáa er búið að bólusetja; afléttingu sóttvarnaaðgerða og síðast en ekki síst útbreiðslu Delta afbrigðis, sem hefur fundist í rúmlega hundrað löndum.
Það jákvæða við þessar slæmu fréttir er að við hér á Íslandi erum framarlega hvað varðar bólusetningar og erum betur í stakk búin að takast á við nýja bylgju af Covid.
Mjög líklegt er, miðað við tölur WHO og hér á landi, að fljótlega verði teknar aftur upp harðar sóttvarnarreglur.