Eins og kunnugt er hafa afbrigði COVID-19 veirunnar verið að greinast undanfarna daga sem ekki haf sést áður hérlendis. Formaður Íslenskrar erfðagreiningar segir mikilvægt að hafa sem allra fyrst uppi á þeim sem hinir sýktu komust í tæri við og setja þá í sóttkví.
„Við verðum að vera vakandi og verðum að hreyfa okkur hratt, ganga úr skugga um að við gerum allt sem við getum til þess að finna þá sem hafa komist í snertingu við þá sýktu og setja þá í sóttkví,“ segir Kári Stefánsson, forstjóri Íslenskrar erfðagreiningar, í samtali við mbl.is, í kjölfar fregna um afbrigði COVID-19 veirunnar sem greinst hafa undanfarna daga og hafa ekki sést áður hérlendis.
Spurður hvort hann óttist að önnur bylgja sé í aðsigi segist Kári ekki vita það. „Það fer allt eftir því hversu vel okkur tekst að hemja þetta þegar það kemst inn í landið. Núna er ég pínulítið kvíðinn af því þessi íþróttamaður og faðirinn í fótboltakeppninni og síðan þeir uppi á Akranesi, þeir tengjast ekki beint, svo það er alltaf sú hætta að það sé eitthvað fólk inni á milli,“ segir hann við mbl.is og vísar þar til smitanna sem hafa verið að greinast hérlendis síðustu daga.
Kári bendir á að til dæmis sé íþróttamaðurinn með stökkbreytingu sem er pínulítið öðruvísi en hjá hinum, það séu tvær stökkbreytingar í viðbót og það gæti bent til þess að það væru einhverjar manneskjur inni á milli sem hefðu sýkst. Segir hann því mikilvægt að hafa uppi á þeim sem komust í snertingu við hina sýktu og setja þá í sóttkví. „Við erum á hættulegu augnabliki en ég hef fulla trú á að við getum náð stjórn á þessu.“