Karlmaður var nýverið ákærður af Héraðssaksóknara fyrir að hafa tvisvar sinnum veitt ólögráða stúlku áfengi í skiptum fyrir munnmök og samræði.
Dv.is greindi frá málinu í dag. Þar kemur fram að brotin séu sögð hafa gerst í upphafi þessa árs. Í fyrra skiptið er maðurinn sakaður um að hafa gefið barninu áfengi í skiptum fyrir munnmök. Þá er hann sakaður um að hafa í annað skiptið látið barnið fá áfengi en þá haft við hana munnmök og samræði.
Héraðssaksóknari kærði manninn fyrir brot brot á 202. grein almennra hegningarlaga sem leggur 1 til 16 ára fangelsi fyrir að hafa samræði eða önnur kynferðismök við barn yngra en 15 ára. Til vara er maðurinn ákærður fyrir brot gegn 204. gr. sömu laga, sem segir að hafi brot gegn áðurnefndu ákvæði verið framið „í gáleysi um aldur,“ skal beita vægari refsingu en ella. Þó skal refsingin ekki fara niður fyrir 1 ár í fangelsi.
Þá krefst foreldri barnsins, fyrir hönd dóttur sinnar, að maðurinn verði dæmdur til að greiðar dóttur sinni þriggja milljóna króna í bætur vegna brotsins, auk vaxta. Saksóknari krefst þess einnig að sá ákærði verði dæmdur til refsingar og greiðslu alls sakarkostnaðar.