„Ekki hefði ég trúað að Vatíkanið legði mig í einelti. Þegar við Magga ákváðum að flytja hingað á Bleikjulækinn á Selfossi trúði ég því sem sagt var, að á milli okkar árinnar og fjallsins yrði aldrei byggt,“ skrifar Jón Gunnar Ottósson líffræðingur á Selfossi um byggingaframkvæmdir kaþólsku kirkjunnar við bakgarð hans. Framkvæmdirnar koma sem þruma úr heiðskýru lofti þar sem um er að ræða skilgreint útivistarsvæði sem tryggði Jóni Gunnari og eiginkonu hans, Margréti Frímannsdóttur útsýni yfir ána og til Ingólfsfjalls.
Páfinn sér til þess að örfínt malarryk leggst í allt
„Nú hefur kaþólska kirkjan allt í einu hafið byggingaframkvæmdir á svæðinu. Vatíkanið hefur líklega borgað Árborg (sem er í fjárhagsörðuleikum) vel fyrir risalóð á útivistarsvæði undir kirkju og safnaðarheimili. Verða þó vonandi ekki háreistar byggingar,“ skrifar Jón Gunnar.
Í góðviðriðinu sem nú stendur hafa óþægindi vegna framkvæmdanna plagað hjónin. „Það er ekki hægt að hengja út þvott á snúrustaurana. Páfinn sér til þess að örfínt malarryk leggst í allt sem hengt er á snúrur. Vona að páfinn og Vatíkanið láti af þessu áreiti í okkar garð,“ skrifar Jón Gunnar.