Helga Vala Helgadóttir, þingmaður Samfylkingarinnar, er stórhneyksluð á röðun ræðumanna í annarri umræðu á Alþingis um frumvarp sem snýr að viðurlögum vegna hlutfalls kynja í nefndum og stjórnum ríkis- og sveitarfélaga.
Helga Vala birti skjáskot á Twitter af röðun þeirra sem taka þátt í umræðunni og eru þar bara karlar og þar af þrír þeirra sem sátu á Klaustri um árið og töluðu fremur ósmekklega um samstarfskonur sínar á Alþingi. Ólafur Ísleifsson, Karl Gauti Hjaltason, Brynjar Níelsson, Njáll Trausti Friðbertsson, Óli Björn Kárason og Bergþór Ólason eru nöfnin sem birtast á vef þingsins sem Helga Vala birti á Twitter.
Önnur umræða um frumvarp Lilju Rafneyjar Magnúsdóttur sem snýr að viðurlögum vegna hlutfalls kynja í stjórnum fer nú fram á Alþingi.
Í frumvarpinu er meðal annars lagt til að við skipun í stjórnir á vegum ríkis og sveitarfélaga skal þess gætt að hlutfall kvenna og karla sé sem jafnast og ekki minna en 40% þegar um fleiri en þrjá fulltrúa er að ræða.
Fyrstur til að veita frumvarpinu andsvar var Brynjar Níelsson þar sem hann spurði hvers vegna horft væri til Noregs í greinargerðinni. „Ég held það sé verið að bera saman epli og appelsínur þarna,“ sagði Brynjar.
Þá sagðist Karl Gauti rétt í þessu alls ekki vera á móti jafnrétti en fullyrðir þó að hann og Miðflokkurinn í heild sinni greiði atkvæði gegn frumvarpinu í þeirri mynd sem það er í dag.