Friðjón Friðjónsson, kosningastjóri og PR-ráðgjafi Sjálfstæðisflokksins undanfarin ár, spáir á Twitter að flokkur sinn verði ekki í næst ríkisstjórn. Hann virðist telja að næsta ríkisstjórn verði skipuð þeim flokkum sem skipa núverandi borgarstjórn Reykjavíkur.
Friðjón skrifar aðsenda grein í Morgunblaðið í dag þar sem hann kvartar undan því að Sjálfstæðisflokkurinn sé að vera eingöngu íhaldsflokkur, að hann sé ekki lengur flokkur breytinga. Svanborg Sigmarsdóttir, framkvæmdastjóri borgarstjórnarflokks Viðreisnar, býður hann velkominn í þann flokk á Twitter þar sem hún skrifar:
„Mér sýnist á öllu að ég geti boðið Friðjón velkominn í Viðreisn. Alltaf gott að fá öflugt fólk inn fyrir kosningar til að ná kerfisbreytingum í gegn í landbúnaði, sjávarútvegi… Svo er alltaf best að skrá sig formlega á http://vidreisn.is. Það lesa ekki allir Moggann.“
Friðjón svarar þessu og virðist ekki skemmt. „Þakka boðið en verð að afþakka, ég er hægri maður og Viðreisn er á hraðferð til vinstri. Maður sér varla mun á ykkur, Samfylkingin og Pírötum í eltingaleiknum,“ segir Friðjón.
Því svarar Svanborg: „Erum við of mikið að reyna að styðja einkaframtakið á heilbrigðisþjónustu? Er það of erfitt fyrir hægri manninn? Eða er það að við viljum uppstokkun á landbúnaði? eða breytingar á kvótakerfinu og nýta til þess markaðslausnir?“
Þá kemur svar Friðjóns sem verður vart túlkað öðru vísi en hann spái tapi Sjálfstæðisflokksins í næstu kosningum. „Eitt er um að tala, annað er að gera. Þess sjást engin merki í stjórn borgarinnar að Viðreisn sé öðruvísi flokkur en hinir vinstri flokkarnir. Hví skyldi það verða öðruvísi þegar þið hoppið í bælið með sömu flokkum í haust?“