Hópurinn skápa grams á Facebook er athyglisverður hópur, stofnaður af Kristbjörgu Kamillu Sigtryggsdóttur. Mannlíf hafði samband við hana og spurði hana út í hópinn.
Hvað varð til þess að þú ákvaðst að stofna hópinn ?
Það er alltaf eitthvað sem lendir aftast í skápunum, ísskápnum eða botninum á frystikistunni. Að matreiða úr því sem þar leynist er mikill sparnaður þegar uppi er staðið. Það að fá hugmyndir og gefa hugmyndir er bara skemmtilegt og mjög gagnlegt.
Út á hvað gengur hópurinn ?
Hópurinn gengur út á það að minnka matarsóun, nýta það sem til er og uppgötva nýjar uppskriftir.
Er hópurinn að reynast gagnlegur ?
Já hann er að reynast mjög gagnlegur. Ég hef til dæmis lært heilmikið hvað varðar skipulag og það að setja mér einhvers konar fjárhagsleg markmið. Að taka alla eyðslu saman og sjá upphæðina var sem dæmi mjög sjokkerandi. Því er gott að taka skápa grams.
Myndir þú segja að hópurinn væri fyrir alla ?
Já, það ættu allir að taka skápa grams af og til. Það kennir manni að kíkja aftast eftir því sem vill oft gleymast og athuga stöðuna reglulega.