Mál Vítalíu Lazareva hefur vakið gríðarlega athygli á landinu undanfarna viku en hún fór í viðtal í hlaðvarpsþætti Eddu Falak, Eigin konur og opnaði sig um ástarsamband sitt við Arnar Grant. Þar segir Vítalía meðal annars frá bústaðaferð sem hún fór í ásamt Arnari og þremur vinum hans. Í heita pottinum segir Vítalía að mennirnir hafi farið yfir mörk hennar og Arnar ekkert gert til að grípa inn í aðstæðurnar.
Kristín Soffía Jónsdóttir, fyrrum borgarfulltrúi Samfylkingarinnar, skrifaði sterka færslu á Twitter sem vakti verðskuldaða athygli. Þar segir hún frá sinni eigin pottaferð með þremur strákum.
„Ég veit ekki hver þarf að heyra þetta. Um daginn fékk ég memorie á FB frá því ég var í háskóla í USA. Þetta var Thanksgiving helgi og við vorum fjögur á kampus. Ég og þrír strákar. Við skemmtum okkur konunglega og fórum meðal annars í heitan pott. Ég tók mynd og setti á FB.
Þetta var góð minning um fyndið og skemmtilegt kvöld. Enginn káfaði á neinum. Það að fara með þremur eða fleiri mönnum í heitan pott er ekki ávísun á neitt og þú átt ekki að þurfa að sitja undir því að hafa sett þig í hættu.“