Kristinn Ingvarsson hefur sagt skilið við Íslenska ættleiðingu en hann hefur gengt stöðu framkvæmdastjóra samtakanna síðastliðin 12 ár.
Á Facebook birti Kristinn fallegan kveðjupistil á dögunum þar sem hann talar um tíma sinn hjá ÍA.
„Eftir 12 frábær ár hjá Íslenskri ættleiðingu skilja leiðir og ég legg straujárnið á hilluna. Þessi ár hjá Íslenskri ættleiðingu hafa verið stórkostleg og kveð ég þetta magnaða félag með fallega tilganginn með söknuði. Ég er fyrst og fremst stoltur og þakklátur fyrir að hafa fengið að koma að öllum þessum ættleiðingum þessara barna sem eiga stóran hluta í hjarta mínu. Það eru forréttindi að hafa fengið að kynnast þeim og fjölskyldum þeirra, fá að fylgjast með þeim vaxa og dafna.
Þá talar Kristinn einnig um það hversu stoltur og þakklátur hann sé að hafa fengið að taka þátt í að gjörbreyta ættleiðingamálaflokknum á Íslands. „Tekið þátt í að búa til það sem nú er kallað íslenska ættleiðingarmódelið sem hefur gjörbreytt hugmyndafræði um ættleiðingar og þjónustu við ættleidd börn og fjölskyldur þeirra. Módel sem hefur vakið athygli langt út fyrir landssteinana og ættleiðingafélög og ættleiðingayfirvöld erlendis eru að skoða sem fyrirmyndir í málaflokki sem þarf að breytast.“
Því næst snýr Kristinn sér að fólkinu sem hann hefur kynnst á þessum 12 árum. „Ég hef kynnst stórkostlegu fólki, jafnt samstarfsfólki, stjórnarfólki, erlendum samstarfsaðilum, umsækjendum, foreldrum og börnum, sem öll hafa haft áhrif á líf mitt. Fyrir það er ég þakklátur.“
Kristinn hyggst flytjast búferlum ásamt fjölskyldu sinni og á vit nýrra ævintýra. „Þessar breytingar koma til að því að við fjölskyldan erum á leið í ný ævintýri og ætlum að hreiðra um okkur á meginlandinu. Minn betri helmingur Birna Ósk hefur þegið starf sem framkvæmdastjóri hjá AMP Terminals, sem er dótturfélag Maersk, en með höfuðstöðvar í Haag. Þangað munum við flytja um áramót og hlökkum við mikið til nýrra áskoranna og ævintýra.“
„Straujárnið og sparifötin verða ávallt til taks þegar ný fjölskylda sameinast. Ég mun halda áfram að samgleðjast og fá sæluhroll þegar þessi dásamlegu augablik verða til. Í auðmýkt þakka ég fyrir mig og held hljóðlega af stað.“