Krúttleg í Costco

Arnar Grant og Vitalía Lazereva eru án efa fræg­asta par Íslands í dag; í stuttu máli sagt þá hefur sam­bandi þeirra verið lýst sem dýrasta ást­ar­sam­bandi Íslands­sög­unnar.

Þau hafa sést saman und­an­farið; versl­uðu saman í Krónunni í Hafn­ar­firði nýverið.

Arnar og Vítalía kíktu við í Costco um dag­inn – eins og sést á mynd­inni með þess­ari frétt.

Þau vekja afar mikla athygli hvar sem þau koma saman.

Til upp­rifj­unar þá var það í lok júní sem fregnir bár­ust af því að Arnar og Vítalía höfðu verið kærð til hér­aðs­sak­sókn­ara fyrir til­raun til fjár­kúg­unar, hót­anir og brot gegn frið­helgi einka­lífs.

Voru kærendur þeir Ari Edwald, Hregg­viður Jóns­son og Þórður Már Jóhannes­son.

Upphaf máls­ins var í byrjun þessa árs, þegar Vítalía greindi frá því í hlað­varps­þætt­inum Eigin konur, að hún ætl­aði sér að leita réttar síns; eftir að hafa orðið fyrir meintu kyn­ferð­is­of­beldi af hálfu þre­menn­ing­ana.

Í þessum sama þætti greindi hún einnig frá ást­ar­sam­bandi sínu við kvæntan mann – Arnar Grant – sem bauð henni í sum­ar­bú­stað; þar sagði hún að sagði meint brot hefðu átt sér stað í heitum potti við sum­ar­bú­stað Þórðar Más, þar sem fjór­menn­ing­arnir voru naktir ásamt henni.

Þá lýsti Vítalía því einnig í við­tal­inu við Eddu Falak hvernig Arnar hefði veitt fjöl­miðla­mann­inum Loga Bergmann kyn­ferð­is­legan aðgang að henni í golf­ferð haustið 2021.

Mikið upp­nám var vegna upp­ljóstran­anna; Logi missti vinn­una eins og Ari Edwald. Þórður Már sagði af sér sem stjórn­ar­for­maður Festis, sem rekur Krónuna. Arnar skildi við konu sína.

Þá var það rakið til máls­ins að Eggert Þór Krist­ó­fers­son, for­stjóri Festis, var rek­inn úr starfi.

Eggert hafði sýnt mál­stað Vítalíu skiln­ing; átti við­ræður við hana. Sex mán­uðum eftir upp­ljóstr­un­ina, í byrjun júlí, steig Arnar Grant loks fram og sagði Vítalíu ekki hafa farið rétt með frá­sögn af Loga.

Spurður hvers vegna hann hafi þagað yfir þessu í hálft ár, svar­aði Arnar:

„Hvar átti ég að byrja til að vinda ofan af þessu? Skaðinn var skeður og ég vildi bara hlífa fjöl­skyld­unni og öðrum. Ég var hræddur við enn meira skít­kast, ásak­an­irnar voru svo þungar að ég átti ekki von á að mér yrði trúað. And­rúms­loftið í sam­fé­lag­inu var ekki vin­veitt og ég vildi bara ekki fara í ein­hvern leðjuslag.“